mardi 7 juin 2016

طرقي في التعطير في رمضان Ramadan Mini Haul




كل عام وانتما بألف خير، كلها نهار  ويدخل علينا شهر الخير ان شاء الله
.فكرت نبدل فكرة البوست و نهضر ليكم على شنو شريت من اغراض خاصة برمضان ملي كنت في مكة قبل شهر تقريبا. 
الحمدلله أديت العمرة للمرة الثانية, كنت محتاجة لها و ربي حققها لي. وخا تعدبت فيها شوية بسبب مشكل تجلط الدم ولكن الف الحمدلله و الشكر





فكرت نوريكم شنو خذيت من حاجات خاصين بشهر رمضان و لي مكنستغناش عليهم فالشهر الفضيل,  انا من عشاق البخور والعود والمسك والعنبر فاذا كنتي ماكتقبليش الروائح الشرقية كنصحك تجربي هاذ الطريقة يمكن تغيري رأيك




نبدا بالمسك. هذا مسك مخلط مع ورد و ريحته نظافة و مزيج  شرقي و فرنسي, اسمه مسك الختام من عبد الصمد القرشي. فالحقيقة هو 
لوسيون كثر من عطر و هدشي لي كخليه خفيف و قابل للاستعمال خلال الصيام. كيعطي لمسة شرقية راائعة. و فالمناسبات كنستعمله بحال أساس للعطر مثلا كنزيد عليه توم فورد ولا كلوي. ولكن للصباح و فرمضان بوحدو كيكفي و كيعطي احساس بالفخامة الشرقية لي كتوالم رمضان بطريقة مودرن و شيك. و بلا مانأكد على مسألة النظافة قبل العطر طبعا! العيب الوحيد هو الكمية قليلة دغيا كاتسالا . تقريبا 15 مللتر ب180 درهم. 
الطريقة ديال الاستعمال أول حاجة وشعري فازك كنحط فيدي شوية من مسك الختام و كنوزعه بيدي شوية وكندهن الشعر وخاصة الأطراف  ، و تحت أذنيا وصافي كنكمل روتين ديالي , شي مرات كيعجبني نبخر شعري بالعود ما حده فازك. أنواع العود شي مرة 
نشرح لكم الانواع و الاستعمالات دياله.




هدي مبخرة صغيييييييورة من اجمل المباخر الي عندي حليلوة و شيك و صالحة فأي وقت ولأي حاجة ♥♥♥
كنبخر بها شعري بسهوله ، و حتى حويجاتي كنعطرهم بيها كنشعل فحمة صغيرة و نحط عليها نتفة ديال العود ولا بخور مخلط موجودين عند سويس ارابيان ولا العربية للعود و كنحطها داخل البلاكارات كل شي كيتعطر بلا مجهود و كتبقى الريحة أيام! شريتها من محل صغير كيبيع البخور في أبراج البيت مكة. ألى عندكم شي 
حد ماشي للعمرة وصيوه عليها مغديش تندموا. تمنها كان 200 درهم تقريبا    




 أخر حاجة نوريها لكم هي اساسية عندي, كنشريها ولا كنوصي عليها الوالد ديالي كل عام ملي كيمشي لمكة. و هي عطور خااصة بالزرابي و السجاد ديال الصلاة. هي أساسا صالحة للرويقان ديال الصالونات و التلامط و الفراش. فرمضان كيهمني زربية الصلاة تكون معطرة بعطور شرقية باش كيعطيني احساس بحالا كنصلي فالمسجد الحرام.. و طبعا تما البخور و العطور حاجة مفروغ منها. 
عطر هاجر, مخلط بين الفواكه و الزهور و المسك لذييذ, كنستعمله للعباية ديال الصلاة و السجادة ديالي. 
نسيم الليل هذا قوي شوية مخلط بين العود الكمبودي و المسك و العنبر, كنستعملة فالصالة الكبيرة و الرويقان و الفواط. كيعطي فخامة للدار و الاجواء



الله يعطرني و يعطركم وكل ما حبيتوا بعطورالجنة باذن الله :)


متنساوش تدعيوا مع ولدي فهاد الشهر الكريم الله يعاودو عليكم بالصحة و السلامة و باش ما تمنيتوا 


1 commentaire :

  1. saraha ma3endich m3a dakchi char9i mais 3jbatni l'idee diyal tapis diyal sla <3 <3

    RépondreSupprimer

Related Posts Plugin for WordPress, Blogger...
All Right Reserved to Lily